Ymgynghoriad ar Strategaeth Atal Boddi Cymru
Mae arnon ni eisiau eich barn ar Strategaeth Atal Boddi ddrafft Cymru
Mae dŵr yn rhan bwysig o fywyd yng Nghymru — o afonydd a chamlesi i lynnoedd, cronfeydd dŵr a'n harfordir — ond mae hefyd yn creu risgiau a all arwain at golli bywydau a niwed difrifol. Dyna pam y cyhoeddodd Diogelwch Dŵr Cymru Strategaeth Atal Boddi Cymru am y tro cyntaf (2020-2025) a pham rydyn ni wrthi erbyn hyn yn datblygu strategaeth wedi'i diweddaru. Mae'r strategaeth yn nodi'r ymagwedd genedlaethol at leihau’r niferoedd sy’n boddi a gwella diogelwch dŵr ledled Cymru.
Mae'r ymgynghoriad yma yn gyfle i unigolion, sefydliadau a chymunedau rannu eu barn ar y strategaeth ddrafft a helpu i lunio'r fersiwn derfynol.
Darllenwch Strategaeth Atal Boddi ddrafft Cymru
Lleisiwch eich barn: Ymgynghoriad ↗ Strategaeth Atal Boddi Cymru
Mae Strategaeth Atal Boddi ddrafft Cymru yn cynnig fframwaith cenedlaethol i lywio camau diogelwch dŵr ledled Cymru. Mae'n cynnwys:
- Gweledigaeth - Tuag at ddim boddi: Adeiladu dyfodol lle gall pawb yng Nghymru fod yn ddiogel yn y dŵr, ar y dŵr ac o amgylch y dŵr
- Nodau strategol sy'n canolbwyntio ar weithio gyda theuluoedd sydd wedi’u heffeithio gan foddi, codi ymwybyddiaeth, gwella addysg a data, cryfhau’r gweithredu lleol, a chefnogi arbenigwyr mewn meysydd cysylltiedig
- Camau i’w cymryd gan y partneriaid mewn addysg, gwasanaethau brys, sefydliadau cymunedol a'r llywodraeth
- Ystyried materion sy'n dod i'r amlwg, megis effeithiau newid hinsawdd a chynnydd yn y defnydd o ddŵr agored
Rydyn ni’n gofyn am eich barn ynghylch a yw'r strategaeth:
- yn ymdrin â'r blaenoriaethau cywir ar gyfer lleihau nifer y marwolaethau drwy foddi yng Nghymru
- yn glir ac yn gyraeddadwy
- yn adlewyrchu profiad byw a safbwyntiau lleol
- ag unrhyw fylchau y dylid mynd i'r afael â nhw
Does dim angen gwybodaeth arbenigol arnoch i ymateb: mae croeso i bawb sydd â diddordeb mewn diogelwch dŵr gyfrannu.
Mae'r ymgynghoriad yn agored tan 11 Mawrth 2026